Editorial

Plan complet du site

Disdjuner

Dêrènemint, dji choûteu one confèrince dinéye pa one comére spécialisse di l’amougnî. Èle dijeûve qu’i faleut prinde on rude « pitit d’djuner » (è francès, bin sûr). Adon, gn-a onk dès choûteûs què l’ riprind èt dîre « d’djuner », èt il aveut bin raîson, l’ome. È francès come è walon, disdjuner, ça vout dîre ni pus fé djune ; ôtrumint dit, c’èst l’ preumêre eûréye dèl djoûrnéye. On n’ saureut d’djuner après awè mougnî.
Ça n’ faît nin si longtimps qu’ ça qu’ nos causin.n’, è francès, di d’djuner po l’ preumêre eûréye èt di din.ner po l’ deûzyinme èt c’èsteut fwârt bin insi.
Naturélemint, c’èst todi l’ cia qui bawîye li pus fwârt qu’a drwèt. Èt vèyanmint qu’ lès Francès sont cinquante côps d’pus qu’ nos-ôtes, i nos faurè bin bachî nosse chine adon qu’ c’èst nos-ôtes qu’a raîson. C’èst pus aujîy di s’ comprinde avou dès mots qui volenut dîre li minme pa tos costés. Minme si dji n’ so nin d’acôrd avou lès djins d’à costé, dji vou co bin qu’on cause di « p’tit d’djuner » è francès, mins s’i vos plaît, ni v’noz nin fé l’ minme è walon ! C’è-st-on mot qui dj’ vwè todi d’pus dins lès scrîjadjes. I n’ faut nin todi waîtî su s’ vèjin, fwârt avant s’il a twârt ! È walon come è flamind, come èn-anglès, come èn-alemand èt sûremint dins one masse d’ôtes lingadjes, l’eûréye di doze eûres, c’èst l’ dinner ; li cène do matin, li d’djuner èt l’ cène d’au gnût, c’èst l’ soper. Èt i n’ tint co qu’à vos d’ bwêre li cafeu à quatre eûres.
Là d’ssus, qui ça n’ vos-èspêtche nin d’ mougnî on bon bokèt d’ buche po l’ Noyé èt on bon bokèt d’ wastia po l’ novèl an… èt co dè l’ mougnî po d’djuner si vos v’loz !

Chantal DENIS